تیونس (آن لائن) تیونس کے وزیراعظم نے چھ ماہ میں دوسری حکومت کا اعلان کیا ہے۔ وزیراعظم ہشام مشیشی نے اپنی کابینہ کا اعلان کرتے ہوئے ملک کی تباہ حال معیشت پر توجہ دینے کی بات کی ہے۔بعد ازاں المشیشی نے ایک پریس کانفرنس میں آزاد ٹیکنوکریٹس پر مشتمل کابینہ کا اعلان کیا۔

اس اقدام کا مقصد سیاسی تنازعات سے کنارہ کش رہتے ہوئے ملک کی معیشت کو درست کرنا ہے۔المشیشی کے مطابق ان کی کابینہ میں خود مختار شخصیات شامل ہیں۔المشیشی کا مزید کہنا تھا کہ “سیاسی جماعتوں اور پارلیمانی گروپوں کے ساتھ مسلسل مشاورت اور ملک کی اقتصادی، سیاسی اور سماجی صورت حال کا جائزہ لینے کے بعد خود مختار اور اہلیت کے حامل افراد (ٹیکنوکریٹس) کی حکومت تشکیل دینے کی ضرورت محسوس ہوئی جو اقتصادی اور سماجی صورت حال پر توجہ مرکوز کرے تیونس کے عوام کے ساتھ ان کے استحقاق کے مطابق معاملہ کرے۔المشیشی نے اس عزم کا اظہار کیا ہے کہ ان کی حکومت مکمل خود مختاری کے ساتھ کام کرے گی۔المشیشی کی حکومت میں 28 وزراء شامل ہیں۔تیونس کے صدر قیس سعید نے 46 سالہ ہشام المشیشی کو گذشتہ ماہ نئی حکومت تشکیل دینے کی ذمے داری سوپنی تھی۔ المشیشی اس سے قبل الیاس الفخفاخ کی حکومت میں وزیر داخلہ کے منصب پر فائز تھے۔ دوسری جانب حکومت سازی کے عمل میں نظر انداز کیے جانے پر اتحادی جماعت النہضہ نے ناراضگی کا اظہار کیا ہے۔