تہران،ریاض ،کویت سٹی(این این آئی )ایران میں چین سے پھیلنے والے کروناوائرس سے مزید 97 افراد ہلاک ہو گئے ہیں جس کے بعد اس مہلک وائرس سے مرنے والوں کی تعداد 611 ہوگئی ہے۔غیرملکی خبررساں ادارے کے مطابق ایران کی وزارت صحت کے ترجمان کیانوش جہانپور نے ایک نشری نیوزکانفرنس میں کہا کہ گذشتہ چوبیس گھنٹے کے دوران میں 1365 نئے کیسوں کی تشخیص ہوئی ہے۔
یوں اب تک ایران میں اس مہلک وائرس کا شکار ہونے والے مریضوں کی کل تعداد 12729 ہوگئی ہے۔انھوں نے بتایا کہ کرونا وائرس کے تصدیق شدہ کیسوں میں 43 سو سے زیادہ افراد صحت یاب ہوچکے ہیں۔ترجمان کے مطابق نئے کیسوں میں 347 کا تعلق صوبہ تہران ، 155 کا اصفہان اور 134کا شمالی علاقے البرز سے ہے۔انھوں نے قبل ازیں خبردار کیا تھا کہ ایران کے نئے سال نوروز کے 20 مارچ کو آغاز سے قبل مہلک وائرس سے متاثر ہونے والے افراد کی تعداد میں اضافہ ہوسکتا ہے۔انھوں نے لوگوں پر زوردیا ہے کہ وہ اپنے سفر کو محدود کردیں۔ان کا کہنا تھا کہ مہلک وائرس سے بیمار پڑنیوالوں کی شرح بدستور بڑھتی جارہی ہے۔دریں اثنا سعودی عرب نے کرونا وائرس کے 17 نئے کیسوں کی تصدیق کی ہے۔میڈیارپورٹس کے مطابق ایک بیان میںسعودی وزارتِ صحت نے کہاکہ مملکت میں اب تک اس مہلک وائرس سے متاثرہ افراد کی تعداد 103 ہوگئی ہے۔قبل ازیں سعودی عرب نے مہلک کرونا وائرس کو پھیلنے سے روکنے کی کوششوں کے ضمن میں اتوار 15 مارچ سے تمام بین الاقوامی پروازیں دو ہفتے کے لیے معطل کرنے کا اعلان کردیا ۔سعودی وزارت داخلہ کے ایک بیان کے مطابق مملکت نے مسافروں کے لیے تمام بین الاقوامی پروازوں کو دو ہفتے تک معطل کرنے کا فیصلہ کیا ہے۔
البتہ غیر معمولی کیس اس فیصلے سے مستثنا ہوں گے۔سعودی عرب نے پروازوں کی معطلی سے مملکت میں لوٹنے میں ناکام رہنے والے شہریوں اور مکینوں کے لیے سرکاری تعطیل کا اعلان کیا ہے۔مملکت میں واپسی پر طبّی تنہائی میں رکھے گئے افراد پر بھی اس فیصلے کا اطلاق ہوگا۔علاوہ ازیں کویت کی حکومت نے کرونا وائرس کے بڑھتے خطرے کے پیش نظر تمام کاروباری سرگرمیاں معطل کرنے کا اعلان کرتے ہوئے بازار اور تجارتی مراکز بند کردیے۔
میڈیارپورٹس کے مطابق گذشتہ روز کویت کی کابینہ کا اہم اجلاس ہوا جس میں کرونا وائرس کے پھیلتے خطرات اور اس کی روک تھام کیلیے اختیار کردہ احتیاطی تدابیر پرغور کیا گیا۔اجلاس میں کرونا کی روک تھام کے لیے اہم فیصلے کیے گئے۔ کویتی حکومت کے ترجمان طارق المزرم نے بتایا کرونا سے بچائو کے لیے بنیادی ضرورت کی خریداری مراکز کے سوا تمام بڑے تجارتی مراکز، شاپنگ سینٹرز اور بازار بند کرنے کا فیصلہ کیا گیا۔ اس کے علاوہ مملکت میں تمام تفریحی مقامات، کلب اور سیلون بندکردیے گئے ہیں اور ان میں خواتین اور بچوں کا داخلہ روک دیا گیا ہے۔
