سرینگر (این این آئی)مقبوضہ کشمیر میں قابض بھارتی فورسز نے لوگوں کو خوفزدہ کرنے اور تحریک آزادی سے ان کی توجہ ہٹانے کے لیے اب بازاروں کو نذرآتش کرنے کا سلسلہ شروع کردیا ہے۔ کشمیر میڈیا سروس کے مطابق ضلع بڈگام کی تحصیل بیروہ میں گذشتہ 15 روز کے دوران ایسی پراسرار وارداتوں میں 15 دکانیں نذرآتش کردی گئی ہیں۔ مقامی لوگوں کے مطابق ہفتہ اور اتوار کی درمیانی شب بیروہ قصبے کے بس اڈے میں 12 دکانیں خاکستر کردی گئی ہیں جن میں زیادہ تر پھل فروشوں کی تھیں۔ اس سے پہلے اسی بازار میں تین الگ الگ واقعات میں
غلام محمد رنگروٹ، پرویز احمد وازہ اور مشتاق احمد بٹ کی دکانیں جلائی گئیں۔ پے درپے پیش آنے والے ان واقعات کی وجہ سے علاقے میں خوف و دہشت پھیل گیا ہے۔ لوگوں کا کہنا ہے کہ 5 اگست کے بعد مقبوضہ کشمیر کی سڑکیں اور بازار مکمل طور پر بھارتی فورسز کے کنٹرول میں ہیں جبکہ د ن کے اوقات میں بھی لوگوں کی نقل و حرکت پر پابندی عائد ہے اور یہ ممکن ہی نہیں ہے کہ بھارتی فورسز کے سوا کوئی دوسرا یہ واقعات انجام دے سکے۔