بغداد(این این آئی)عراق کی حکومت نے البصرہ شہر میں عالمی معیار کا بڑا بحری فوجی اڈہ تیار کرنے کا اعلان کیا ہے۔عرب ٹی وی کے مطابق عراقی وزارت دفاع کی طرف سے جاری ایک بیان میں کہا گیا کہ بصرہ گورنری میں جس بڑے نیوی اڈے کے قیام کا اعلان کیا گیا اس پرجلد ہی کام شروع کیا جائے گا۔ بیان میں کہا گیا کہ بصرہ میں قائم کیا جانے والا بحری فوجی اڈہ ملک
کی دفاعی ضرورت کیلیے اہمیت کا حامل ہوگا۔عراقی وزارت دفاع کی طرف سے یہ بیان ایک ایسے وقت میں جاری کیا گیا جب حال ہی میں وزیر دفاع نجاح الشمری ، وزیر ٹرانسپورٹ عبداللہ لعیبی، پارلیمنٹ کی دفاع وسیکیورٹی کمیٹی کے چیئرمین محمد رضا،آرمی چیف کے معاون برائے آپریشنز میجر جنرل عبدالامیر رشید یار اللہ اور دیگر اعلیٰ حکام نے البصرہ کا دورہ کیاتھا۔
