کویت سٹی(سی پی پی)کویت کی وزارت اسلامی امور نے ملک میں شدیدگرمی کے باعث جمعہ کا خطبہ مختصر کرنے کا حکم جاری کیا ہے۔ وزارت کی طرف سے جاری سرکلر میں کہا گیا ہے کہ تمام مساجد میں خطبہ جمعہ کو مختصر کیاجائے تاکہ وہ افراد جو دیر سے مسجد پہنچتے ہیں۔
اور انہیں مسجد کے اندر جگہ نہیں ملتی دھوپ میں نماز ادا نہ کریں۔وزارت اسلامی امور و اوقاف نے کہا ہے کہ ان علاقوں میں جہاں آبادی زیادہ ہے خطبہ جمعہ کو 10سے 15 منٹ تک محدود کردیاجائے تاکہ نمازیوں کو دشواری کا سامنا نہ کرنا پڑے۔ واضح رہے کہ سعودی عرب سمیت خلیجی ریاستوں میں گرمی کی شدت میں غیر معمولی اضافہ ہو رہا ہے اور مقامی شہریوں اور غیر ملکیوں کو خصوصی احتیاطی تدابیر اختیار کرنے کی ہدایت کی گئی ہے۔سعودی عرب کے ماہر موسمیات حسن کرانی نے کہا کہ سائے میں درجہ حرارت 47 سے 50 ڈگری تک پہنچنے کا امکان ہے۔ مملکت کے مغرب سے وسطی اور شمال سے مشرقی سمتوں سے آنے والی ہوائیں انتہائی گرم اور خشک ہوں گی۔ سعودی عرب کے وسطی اور شمالی علاقوں میں گرمی کی شدت غیر معمولی ہوگی، لوگ دوپہر کے وقت اشد ضرورت کے علاوہ باہر نہ نکلیں، اگر باہر نکلنا لازمی ہو تو چھتری کا استعمال کریں اگر چھتری نہ ہو تو سر ڈھانپ کر رکھیں تاکہ براہ راست گرم ہوا سے بچا جاسکے۔عسیر ریجن کی بلدیہ نے موسم گرما میں صفائی کے کارکنوں کو دھوپ کی شدت سے بچانے کیلئے خصوصی ٹرالیاں فراہم کی ہیں جن پر چھتری کا بھی بندوبست ہے اس کے علاوہ ان کے کام کا دورانیہ بھی کم کردیا جاتا ہے۔ سعودی عرب میںکارکنوں سے دوپہر 12 سے سہہ پہر 3 بجے تک کھلی دھوپ میں کام نہ کرانے کی ہدایت پر سختی سے عملدرآمد کی ہدایت کی گئی ہے۔ مملکت میں شدید گرمی کے باعث بیشتر مارکیٹیں شام 5 بجے کے بعد کھلتی ہیں۔
