بیجنگ(آن لائن) چین نے منگل کے روز امریکی صدر ڈونلڈ ٹرمپ کی جانب سے ایران پر نئی پابندیاں عائد کرنے کے بعد امریکہ ایران کشیدگی میں اضافہ کے پیش نظر صبر و تحمل سے کام لینے مطالبہ کیا ہے۔ چینی وزارت خارجہ ترجمان گینگ شوانگ نے بیجنگ میں پریس بریفنگ کے دوران کہا کہ ہم یقین رکھتے ہیں کہ آنکھیں بند کرکے اندھا دھند دباؤ ڈالنے سے مسئلہ حل کرنے میں مدد نہیں ملے گی۔ انہوں نے مزید کہا کہ حقائق ثابت کرچکے ہیں ان اقدامات کا الٹ اثر مرتب ہوتا ہے اور علاقائی بدامنی کوہوا دیتے ہیں۔ واشنگٹن
اور تہران کے درمیان گزشتہ چند ہفتوں سے تعلقات میں تیزی سے بگاڑ آیا ہے جب امریکہ نے ایران پر حساس خلیجی پانیوں میں بحری جہازوں پر حملوں میں ملوث ہونے کا الزام عائد کیا ہے جس کی تہران کی جانب سے سختی سے تردید کی گئی ہے۔پیر کے روز ٹرمپ نے علاقائی تنازعہ کو مزید ہوا دی جب ایران کے سپریم رہنما آیت اللہ علی خامنائی اور اعلیٰ فوجی سربراہان کیخلاف پابندیاں عائد کردی گئی۔گینگ کا کہنا تھا کہ ہم امید رکھتے ہیں کہ فریقین صبر و تحمل سے کام لینگے اور کشیدگی میں مزید اضافے سے بچیں گے۔
