دمشق(این این آئی)اسرائیل نے منگل اور بدھ کی درمیانی شب شام کے دارالحکومت دمشق میں ایرانی پاسداران انقلاب اور لبنانی حزب اللہ ملیشیا کے ٹھکانوں پر فضائی حملے کیے جن میں حزب اللہ کے کم سے کم تین اسلحہ گودام تباہ ہوگئے ۔شام میں انسانی حقوق کے آبزرور رامی عبدالرحمان نے عرب ٹی وی سے بات چیت کرتے ہوئے کہاکہ اسرائیل نے دمشق کے نواحی علاقون الکسوی اور الدیماس میں حزب اللہ کے مبینہ ٹھکانوں پر بمباری کی۔اسرائیلی جنگی طیاروں نے دمشق کے جنوب اور مغرب میں
حزب اللہ اور ایرانی ملیشیا کے ٹھکانوں کو نشانہ بنایا۔دوسری جانب شامی ذرائع ابلاغ نے رات گئے خبر دی کہ اسرائیلی میزائل حملوں سے دمشق کے نواحی علاقوں کو نشانہ بنایا گیا ۔شامی محکمہ دفاع نے جوابی میزائل داغے ہیں اور ایک میزائل لبنان کی وادی البقاع میں گرا ،شام کی طرف سے داغے گئے میزائلوں کے خلاف اسرائیل نے اپنے دفاعی نظام کو فعا کردیا تھا۔ وادی گولان کی فضاء میں ایران کے متعدد میزائل روک دیئے گئے ۔ اسرائیل نے دعویٰ کیاکہ وادی گولان پر روکے گئے میزائل شام سے داغے گئے تھے۔
