تہران (انٹرنیشنل ڈیسک )ایران میں ایک نوجوان شخص کو کرین کے ذریعے سفاکانہ انداز میں سرعام پھانسی پر لٹکانے کی ایک ویڈیو منظر عام پر آئی ہے۔غیرملکی خبررساں ادارے کے مطابق انسانی حقوق کے کارکنان نے سوشل میڈیا پر اس کو پھانسی دینے کی ویڈیوشیئر کی ہے۔انھوں نے دعویٰ کیا کہ اس شخص کو ایران کے جنوبی شہر مرودشت میں سرعام کرین کے ذریعے تختہ دار پر لٹکایا گیا تھا۔یہ بتایا گیا ہے کہ پھانسی والے شخص کی عمر 26 سال تھی ۔وہ گذشتہ 13 سال سے جیل میں قید تھا۔

اس کو جب گرفتار کیا گیا تھا تو اس وقت وہ ایک نوعمر لڑکا تھا اور اس کی عمر 13 سال کے لگ بھگ تھی۔فوری طور پر یہ معلوم نہیں ہوسکا کہ اس سے اتنی کم عمری میں کیا سنگین جرم سرزد ہوا تھا۔اس کی پھانسی کے منظر کو دیکھنے کے لیے سیکڑوں افراد جمع ہیں۔ویڈیو میں پس منظر میں بعض عورتوں کی رونے کی آوازیں بھی سنائی دے رہی ہیں اور ان کے بارے میں خیال کیا جاتا ہے کہ وہ مصلوب شخص کی رشتے دار ہیں۔وہ اس انداز میں پھانسی دینے کے عمل کی مذمت کررہی ہیں۔

موضوعات:ایران