دبئی (مانیٹرنگ ڈیسک) باہمی رابطوں کیلئے استعمال ہونے والے مقبول سافٹ ویئر ’’اسکائپ‘‘ کو متحدہ عرب امارات میں بلاک کردیا گیا۔ متحدہ عرب امارات کی ٹیلی کام کمپنی اتصالات کی جانب سے سماجی رابطوں کی ویب سائٹ ٹوئٹر پر جاری پیغام میں کہا گیا کہ ملک بھر میں اسکائپ تک رسائی کو بلاک کردیا گیا ہے۔اتصالات کا کہنا تھا کہ اسکائپ بغیرلائسنس وائس اوور انٹرنیٹ پروٹوکول سروس (VoIP) دے رہی ہے اور بغیرلائسنس وائس اوورآئی پی سروس غیرقانونی ہے۔ دوسری جانب

اسکائپ کی جانب سے جاری بیان میں کہا گیا ہے کہ ’’یہ بات ہمارے علم میں لائی گئی کہ ہماری ویب سائٹ اور سروسز کو یو اے ای میں انٹرنیٹ سروس پرووائیڈرز کی جانب سے بلاک کردیا گیا ہے جس کے بعد یو اے ای میں آپ اسکائپ تک رسائی حاصل نہیں کرسکتے‘‘۔خیال رہے کہ اسکائپ کے ذریعے کمپیوٹر، اسمارٹ فونزاور ٹیبلیٹس وغیرہ پر وائس اور ویڈیو کالز کی جاتی ہیں اور اس سروس کی بندش سے متحدہ عرب امارات میں موجود صارفین کو شدید پریشانی کا سامنا کرنا پڑا۔