سرینگر(این این آئی)مقبوضہ کشمیر میں ضلع اسلام آباد کے علاقے پہلگام میں  ایک بھارتی فوجی نے اپنی سروس رائفل سے اپنے آپ پر گولی چلاکر خودکشی کرلی۔کشمیرمیڈیا سروس کے مطابق ایک پولیس افسر نے کہا کہ خودکشی کرنے والے فوجی کی شناخت نریندر کے طورپر ہوئی ہے جو بھارتی ریاست کرناٹکا کے علاقے بنگلور کا رہنا والاتھا۔اس واقعے سے مقبوضہ علاقے میں جنوری 2007ء سے خود کشی کرنے والے بھارتی

فوجی اور پولیس اہلکاروں کی تعداد 388ہوگئی ہے۔ دریں اثنامقبوضہ کشمیر میں اسلام آباد قصبے کے پرانے علاقے میںبھارتی پولیس کے مظالم کے خلاف احتجاج کرنے والے نوجوانوں اور پولیس کے درمیان جھڑپیں ہوئیں جس کے نتیجے میں متعدد افراد زخمی ہوگئے۔ کشمیرمیڈیا سروس کے مطابق نوجوانوں نے سڑکوں پر نکل کر بھارتی پولیس کے مظالم کے خلاف نعرے لگائے۔ بھارتی پولیس نے نوجوانوں کو منتشر کرنے کے لیے طاقت کا وحشیانہ استعمال کیا جس کے بعد نوجوانوں اور پولیس کے درمیان جھڑپیں شروع ہوئیں۔ دریں اثناء تاجروں نے قصبے کے صدر پولیس سٹیشن کے ایس ایچ او کے تبادلے کا مطالبہ کرتے ہوئے آج مسلسل دوسرے روز بھی ہڑتال جاری رکھی۔ تاجروں نے ان کو تشدد کا نشانہ بنانے والے ایس ایچ او کے علاقے سے تبادلے تک ہڑتال جاری رکھنے کی دھمکی دی ہے۔ تاجروں کا کہنا ہے کہ پولیس نے گزشتہ روز ریشی بازار میں مظاہرین کے ساتھ جھڑپوں کے دوران ان کی دکانوں کے اندر آنسو گیس کے گولے داغے۔ انہوں نے کہاکہ کئی دکانداروں کو پولیس نے تشدد کا نشانہ بنایا اور چھ کو گرفتار کرلیا۔ تاجروں نے جنہوں نے لالچوک اسلام آباد میں دھرنا دے رکھا ہے ،پولیس کے مظالم بند کرنے اورعلاقے سے ایس ایچ او کے فوری تبادلے کا مطالبہ کیا۔