اسلام آباد (آئی این پی ) پاکستان نے کابل میں کرکٹ سٹیڈیم کے قریب بم دھماکے کی شدید مذمت کرتے ہوئے کہا ہے کہ دہشت گردی کا حملہ بزدلانہ کارروائی ہے،د کھ کی اس گھڑی میں افغان حکومت اور اس کی عوام کے ساتھ ہیں۔بدھ کو ترجمان دفتر خارجہ کی طرف سے جاری بیان میں کہا گیا ہے کہ پاکستان کابل میں دہشتگردی کے واقعے کی شدید مذمت کرتا ہ ۔ترجمان نے واقعے میں جاں بحق ہونے والوں کے لواحقین سے اظہار تعزیت کیا۔
ترجمان دفتر خارجہ کا کہنا تھا کہ دکھ کی اس گھڑی میں افغان حکومت اور اس کی عوام کے ساتھ ہیں ۔ ترجمان نے دھماکے کے زخمیوں کی صحتیابی کے لئے دعا کی ۔واضح رہے کہ افغانستان کے دارالحکومت میں بین الاقوامی کرکٹ اسٹیڈیم کے قریب ہونے والے خود کش حملے کے نتیجے میں پولیس اہلکار سمیت 3 افراد ہلاک ہوگئے۔غیر ملکی میڈیا کے مطابق کابل میں کرکٹ اسٹیڈیم کے باہر خود کش بمبار نے سیکیورٹی چیک پوسٹ پر چیکنگ کے دوران خود کو دھماکے سے اڑا لیا جس کے نتیجے میں 3 افراد ہلاک اور 5 زخمی ہوگئے۔ اطلاعات کے مطابق جس وقت دھماکا ہوا اس وقت اسٹیڈیم کے اندر شپاگیزا کرکٹ لیگ کا میچ جاری تھا تاہم حکام کے مطابق دھماکے میں کسی کھلاڑی یا آفیشل کو نقصان نہیں پہنچا۔افغان سیکیورٹی فورسز نے بتایا کہ اہلکار نے اپنی جان کی قربانی دے کر حملہ آور کو اسٹیڈیم کے اندر داخل ہونے سے روکا جہاں ہزاروں افراد موجود تھے۔ افغان کرکٹ بورڈ کے مطابق دھماکے کے بعد میچ کچھ دیر کیلئے روک دیا گیا تھا تاہم کچھ دیر بعد دوبارہ شروع کردیا گیا۔ افغانستان میں شپاگیزا کرکٹ لیگ کے میچز 22 ستمبر تک جاری رہیں گے۔خیال رہے کہ سابق پاکستانی آل راؤنڈر عبدالرزاق بھی افغان کرکٹ لیگ میں شرکت کے لیے کابل میں موجود ہیں۔ ٹیسٹ کرکٹرعبدالرزاق نے افغان کرکٹ لیگ سے معاہدہ کیا ہے اور وہ ایک لاکھ امریکی ڈالرکی سیکیورٹی ضمانت پر لیگ میں شرکت کے لیے گزشتہ جمعرات کوکابل روانہ ہوئے تھے۔عبدالرزاق کے بارے میں معلوم ہوا ہے کہ وہ بالکل خیریت سے ہیں ۔
