اسلام آباد (مانیٹرنگ ڈیسک) کویت نے پاکستان سے ایسے کام کے لیے مدد طلب کر لی کہ کسی کے وہم و گمان میں بھی نہ ہوگا، تفصیلات کے مطابق کویت نے استعمال شدہ تیل سے بائیو ڈیزل تیار کرنے کے لیے پاکستان کو مدد کے لیے کہا ہے۔ ڈاکٹر احمد الکوفاہی جو کہ کویت
واٹر ایسوسی ایشن کے ایگزیکٹو ڈائریکٹر ہیں نے پنجاب فوڈ اتھارٹی کے ڈی جی ڈاکٹر نور الامین مینگل کو خط لکھ کر پنجاب فوڈ اتھارٹی سے کویت کے اندر کھانے کے استعمال شدہ تیل سے بائیو ڈیزل تیار کرنے کے لیے ایک پلانٹ لگانے کے لیے مدد کرنے کو کہا ہے۔ اس میں کہا گیا ہے کہ پنجاب فوڈ اتھارٹی بائیو ڈیزل کی تیاری کے حوالے سے کویت کو سرمایہ کاروں کی شرکت، نگرانی اور منصوبہ بندی میں معاونت فراہم کرے تاکہ ایک بڑا پلانٹ لگایا جا سکے۔ دنیا بھر میں توانائی کے متبادل ذرائع تلاش کیے جا رہے ہیں جس کے تحت بائیو ڈیزل، بائیو گیس، ایتھانول، میتھانول اور دیگر قابل عمل ذرائع پر کام ہو رہا ہے۔ پاکستان میں بائیو فیول کی صنعت کو فروغ دیا جائے تو ہر سال اربوں ڈالر کا زرمبادلہ بچایا جا سکتا ہے، پنجاب فوڈ اتھارٹی نے اسی حوالے سے لاہور ریسٹورنٹ ایسوسی ایشن کے ساتھ مل کر پالیسی بنائی ہے جس کے تحت استعمال کیے گئے کوکنگ آئل کو بائیو ڈیزل کمپنیوں کو بیچ دیا جائے تاکہ ملک میں بائیو ڈیزل کی تیاری ممکن ہو سکے۔ گیارہ کمپنیوں نے گزشتہ ماہ فوڈ اتھارٹی کو بائیو ڈیزل بنانے کے لیے درخواستیں دی ہیں۔
