واشنگٹن(این این آئی)امریکا میں اوسط درجہ حرارت میں تیزی سے اور ڈرامائی انداز میں اضافہ ہوا ہے۔ یہ بات امریکی اخبار نے ایک دستاویز کے حوالے سے اپنی رپورٹوں میں لکھی ہے۔ امریکا میں پچھلی چند دہائیوں کے دوران پچھلے پندرہ سو برس کے سب سے زیادہ درجہ حرارت ریکارڈ کیے گئے۔
موسمیاتی تبدیلیوں کے اثرات پر تیرہ وفاقی ایجنسیوں کی ترتیب کردہ یہ رپورٹ اس مسئلے پر صدر ڈونلڈ ٹرمپ کے موقف کے خلاف ہے۔ رپورٹ میں کہا گیا ہے کہ امریکی شہری موسمیاتی تبدیلیوں کے اثرات ابھی سے دیکھ رہے ہیں۔ نیشنل اکیڈمی آف سائنس کی یہ رپورٹ ہر چار سال میں ایک مرتبہ تیار کی جاتی ہے۔ واضح رہے کہ امریکا موسمیاتی تبدیلیوں کے اثرات کو محدود رکھنے کے حوالے سے پیرس معاہدے سے دستبردار ہونے کا اعلان کر چکا ہے۔
