واشنگٹن(این این آئی)شمالی کوریا کے میزائل پروگرام پر جاری کشیدگی کے دوران امریکہ نے وضاحت کی ہے کہ وہ شمالی کوریا میں اقتدار کی تبدیلی کا ارادہ نہیں رکھتا ہے۔غیرملکی خبررساں ادارے کے مطابق امریکی وزیر خارجہ ریکس ٹیلرسن نے کہاکہ ہم آپ (شمالی کوریا) کے دشمن نہیں ہیں اور اسی کے ساتھ یہ بھی کہا کہ امریکہ کسی موقع پر شمالی کوریا سے بات چیت کا خواہاں ہے۔ٹیلرسن نے کہاکہ ہم اقتدار میں تبدلی نہیں چاہتے،

ہم نہیں چاہتے کہ وہاں موجودہ حکومت ختم ہو جائے، ہم جزیرہ نما کوریاکو تیزی کے ساتھ پھر سے ایک نہیں بنانا چاہتے، ہم 38 متوازی کے مزید شمال اپنی فوج بھیجنے کا کوئی بہانہ بھی تلاش کرنا نہیں چاہتے۔امریکی وزیر خارجہ نے مزید کہاکہ ہم آپ کے دشمن نہیں ہیں، ہم آپ کے لیے خطرہ نہیں ہیں، لیکن آپ ناقابل قبول طور پر ہمارے لیے خطرہ نظر آ رہے ہیں اور ہمیں اس کا جواب دینا ہوگا۔