اسلام آباد(مانیٹرنگ ڈیسک)ون بیلـٹ ون روڈ منصوبے پر بھارت کی چیخیں نکل گئیں، چین اور پاکستان کو نیچا دکھانے کی پے درپے کوششوں میں ناکامی پر بھارتی میڈیا پاگل ہو گیا، چین میں ون بیلٹ ون روڈ منصوبے پر ہونیوالی دو روزہ کانفرنس پر امریکہ نیپال اور بنگلہ دیش

جیسے حمایتی ممالک کی شرکت نے بھارتی حکومت کی نیندیں اڑا دیں۔ تفصیلات کے مطابق بھارتی ٹی وی زی نیوز نے ون بیلـٹ ون روڈ منصوبے پر روایتی بھارتی ذہنیت کی عکاسی کرتے ہوئے اسے بھارت کے خلاف سازش اور سی پیک پر اعتراضات کا طوفان اٹھا دیا ہے۔ زی نیوز کی ایک رپورٹ میں ون بیلٹ ون روڈ منصوبے کو بھارت کے خلاف قرار دیتے ہوئے کہا گیا ہے کہ اس منصوبے سے چین دنیا کی اہم بندرگاہوں اور ممالک تک رسائی میں کامیاب ہو جائے گا جس سے اس کی عالمی منظر نامے میں اہمیت انتہائی بڑھ سکتی ہے، چین بحیرہ ہند میں بھی اپنی موجودگی کا گاہے بگاہے احساس دلا رہا ہے جبکہ سری لنکا اور مالدیپ میں اپنے سٹریٹجک ٹھکانے قائم کر چکا ہے اور اب ون بیلٹ ون روڈ منصوبے میں امریکہ، بنگلہ دیش، نیپال کی شمولیت اسے عالمی منظر نامے میں بہت زیادہ اثر پذیری دے سکتی ہے۔ بھارٹی ٹی وی رپورٹ میں سی پیک پر بھی روایتی ہرزہ سرائی کرتے ہوئے بھارتی حکومت کا موقف بیان کرتے ہوئے کہا گیا ہے کہ چائنہ پاکستان اقتصادی راہداری منصوبہ بھارت کی خودمختاری اور سلامتی کے خلاف ہے اور اسے کسی بھی طور قبول نہیں کیا جائے گا۔ رپورٹ میں ہرزہ سرائی کرتے ہوئے چینی صدر شی جن پنگ پر کڑی تنقید کی گئی اور ون روڈ ون بیلٹ منصوبے کو شی جن پنگ میلہ اور شو قرار دیا گیا ہے۔