عدن ( آئی این پی )امریکی صدر ڈونلڈ ٹرمپ کے منصبِ صدارت سنبھالنے کے بعد یمن میں امریکی فوج کی پہلی منظم کاروائی میں 16شہریوں سمیت 57افراد ہلاک ہوگئے ۔غیر ملکی خبررساں ادارے کے مطابق وسطی یمن کے ایک علاقے میں امریکی فوجیوں کی خصوصی عسکری کارروائی کے دوران16شہری اور 41مشتبہ القاعدہ جنگجو ہلاک ہوگئے ۔

اِس امریکی کارروائی کی یمن کے صوبائی حکام نے تصدیق کی ہے۔قبائلی ذرائع کا کہنا ہے کہ ہکلا ضلع میں کی گئی کاروائی میں ہلاک ہونے والوں میں 8خواتین اور 8بچے بھی شامل ہیں ۔کاروائی میں القاعدہ سے تعلق رکھنے والے 3قبائلی رہنماؤں کے گھروں کو نشانہ بنایا گیا ۔صوبائی حکام کا کہنا ہے کہ کاروائی کے دوران آپاچی ہیلی کاپٹروں نے ایک سکول ، مسجد اور صحت کے مرکز کو نشانہ بنایا جو القاعدہ جنگجوؤں کے استعمال میں تھے ۔دیگر ذرائع کا کہنا ہے کہ آپریشن میں امریکی کمانڈوز نے حصہ لیا تاہم اس اطلاع کی تصدیق نہیں ہوسکی ہے ۔حملے میں مارے جانے والے تین اہم قبائلی رہنماؤں کی شناخت دو بھائیوں عبدالرؤف اور سلطان الزہاب اور سیف الوائی الجوفی کے نام سے ہوئی ہے ۔تینوں القاعدہ کے ساتھ منسلک تھے۔زہاب بردارز کے دیگر دو بھائی بھی ڈرون حملوں میں مارے جاچکے ہیں۔واضح رہے کہ امریکی صدر ڈونلڈ ٹرمپ کے منصبِ صدارت سنبھالنے کے بعد یمن میں امریکی فوج کی یہ پہلی منظم کارروائی ہے۔ ٹرمپ نے اِس عزم کا اظہار کر رکھا ہے کہ وہ اسلامی انتہا پسندی کا صفایا کر دیں گے۔