الجزائر(آئی این پی )الجزائر سے تعلق رکھنے والی رکن پارلیمنٹ اور سابق میڈیا پرسن زہی بن عروس نے ایک دل چسپ انکشاف کرتے ہوئے بتایا ہے کہ لیبیا کے متوفی سربراہ معمر قذافی نے 90 کی دہائی میں ان کو شادی کی پیش کش کی تھی جس کو انہوں نے مسترد کر دیا تھا۔الجزائر کے ایک نجی سیٹلائٹ چینل کے پروگرام میں بطور مہمان گفتگو کرتے ہوئے زہی نے بتایا کہ 1995 میں جب وہ الجزائر ٹیلی وژن میں اینکر پرسن تھیں تو قذافی نے ایک وفد الجزائر بھیجا جس میں لیبین وومنز یونین کی رکن خواتین بھی شامل تھیں۔ ان خواتین نے الجزائر کے ایک سب سے بڑے ہوٹل ” الاوراسی” میں زہی نے ملاقات کی اور انہیں بتایا کہ قذافی انہیں بہت زیادہ پسند کرتے ہیں اور انہوں نے زہی کا رشتہ طلب کیا ہے۔الجزائری رکن پارلیمنٹ کے مطابق وہ اس پیش کش سے بہت زیادہ ڈر گئی تھیں کیوں کہ یہ ایک ریاست کے سربراہ کی جانب سے تھی اور ساتھ ہی ان کو شدید حیرت بھی تھی۔
زہی نے بتایا کہ انہوں نے لیبیائی خواتین کے مطالبے کے جواب کو مسترد کر دیا اور ہمیشہ جواب دینے سے دور بھاگتی رہیں۔زہی بن عروس نے واضح کیا کہ ہر مرتبہ ان کا جواب صرف “ان شا اللہ” ہوتا.. اس لیے کہ شادی کا مطالبہ کرنے والا شخص ایک ریاست کا سربراہ تھا اور اس کی بہت سی بیگمات تھیں۔زہی بن عروس کا شمار ان چند خواتین میزبانوں میں ہوتا ہے جو90 کی دہائی میں ایسے وقت میں بھی پابندی کے ساتھ اسکرین پر جلوہ گر ہوتی رہیں جب اکثر چہرے شدت پسندوں کی جانب سے دھمکیوں کے خوف سے روپوش ہو گئے تھے۔
