ڈھاکہ /نئی دہلی (آئی این پی)بنگلہ دیشی وزیر داخلہ اسدالزمان خان کمال نے پاکستان کے خلا ف ہرزہ سرائی کرتے ہوئے کہا ہے کہ دہشتگردی کی حمایت کرنے پر پاکستان کو تنہا کردینا چاہیے ، بھارت اور بنگلہ دیش میں ہونے والے دہشتگرد حملوں کی جڑیں پاکستان میں ہیں،بنگلہ دیش دہشتگردی کے خلاف جنگ میں بھارت کے ساتھ کھڑا ہے۔
بھارتی خبررساں ادارے ’’پی ٹی آئی ‘‘ کو انٹرویو میں بنگلہ دیشی وزیر داخلہ کا کہنا تھاکہ پاکستان نے ہمیشہ دہشتگردوں کی حمایت کی اور انھیں پناہ دی ہے ۔جو دہشتگردی کی حمایت کرتے ہیں انکی حوصلہ شکنی کی جانی چاہیے اور انھیں تنہا کردینا چاہیے۔ہمیں اسطرح کے حملوں کی کی مذمت اور حوصلہ شکنی کیلئے سب کچھ کرنا چاہیے۔اسطرح کے دہشتگرد حملے کسی بھی ملک کے خلاف نہیں کیے جانے چاہیں۔
اسدالزمان خان کمال نے کہاکہ بنگلہ دیش دہشتگردی کے خلاف جنگ میں بھارت کے ساتھ کھڑا ہے ۔انکا کہنا تھاکہ بھارت اور بنگلہ دیش میں ہونے والے دہشتگرد حملوں کی جڑیں پاکستان میں ہیں۔دونوں ملک دہشتگردی کے مسئلے پر ایک موقف رکھتے ہیں۔ بنگلہ دیشی وزیر داخلہ نے کہاکہ پانی کی تقسیم کے معاہدے میں تاخیر سے بنگلہ دیش میں اپوزیشن جماعتوں اور بنیاد پرست جماعت تنظیموں کے بھارت مخالف جذبات ابھر رہے ہیں۔
