گوا(این این آئی)رواں برس کے اختتام پر سیاحت کے لیے مشہور بھارتی ریاست گوا میں نقدی کا استعمال ماضی کا حصہ بن جائے گا۔ اس طرح گوا نقد کرنسی سے خالی پہلی بھارتی ریاست کا اعزاز حاصل کر لے گی اور یہاں ادائیگی موبائل فون یا کریڈٹ کارڈ کے ذریعے عمل میں آئے گی۔

غیرملکی خبررساں ادارے کے مطابق ریاست کے سکریٹری راجیش کمار کی جانب سے جاری بیان میں کہا گیا ہے کہ لین دین کے تمام معاملات کی ادائیگی موبائل فون اور بینک کریڈٹ کے ذریعے ہو گی۔ رواں برس 31 دسمبر سے یہ نظام ریاست کی تمام اراضی پر لاگو ہوجائے گا۔ اس دوران مچھلی ، گوشت اور سبزیوں کی خریداری بھی شامل ہو گی۔ تاہم تجارتی مراکز اور ہوٹلوں میں اے ٹی ایم مشینیں بدستور کام کرتی رہیں گی جہاں کریڈٹ کارڈ کے ذریعے ادائیگی کی جاسکتی ہے۔