اسلام آباد (مانیٹرنگ ڈیسک) پیرو کے دارالحکومت لیما میں ایپک اجلاس کےموقع پر امریکی صدر اوباما اور روسی صدر پیوٹن کی ملاقات ہوئی ۔ملاقات کے بعد روسی صدر پیوٹن نے پریس کانفرنس کرتے ہوئے امریکی صدر باراک اوباما کو روس آنے کی دعوت بھی دی ۔اس موقع پر روسی صدر پیوٹن نے کئی سال مل کر کام کرنے پر اوباما کا شکریہ بھی اداکیا۔روسی صدر نے بتایا کہ نو منتخب امریکی صدر ڈونلڈ ٹرمپ نےتصدیق کی ہے کہ وہ روس کے ساتھ تعلقات بہتربناناچاہتےہیں تو میں نےبھی ٹرمپ سےکہاکہ ہم بھی امریکا سے بہتر تعلقات چاہتے ہیں۔روسی صدر کا کہنا تھا کہ تاہم ابھی یہ طے نہیں ہوا کہ ڈونلڈ ٹرمپ سے ملاقات کب اور کہاں ہوگی۔
دوسری جانب نومنتخب امریکی صدر ڈونلڈ ٹرمپ کی اہلیہ میلانیا اور ان کے بیٹے بیرن وائٹ ہاؤس منتقل نہیں ہوں گے ۔غیر ملکی میڈیا کے مطابق میلانیا اور ان کا 10سال کا بیٹا بیرن ٹرمپ ٹاور میں رہیں گے۔ذرائع کا بتانا ہے کہ بیرن کی تعلیم مین ہٹن کے ایک نجی اسکول میں جاری ہے اور سال کے درمیان میں ان کے بچے کواسکول سے نہیں نکالا جاسکتا کیوں کہ اس سے اس کا سال ضائع ہوسکتا ہے لہٰذا میلانیا اور ان کے بیٹے بیرن کو اس تعلیمی سال کے اختتام تک ٹرمپ ٹاور میں ہی رہنا ہوگا۔نومنتخب امریکی صدر ڈونلڈ ٹرمپ20 جنوری کو اپنے عہدے کا حلف اٹھائینگے جس کے بعد ٹرمپ وائٹ ہائوس میں ہی رہیں گے۔

موضوعات:اوباما