اسلام آباد(مانیٹرنگ ڈیسک)پاکستان میں سفارت کاری کی آڑ میں کام کرنے والے بھارتی خفیہ ایجنسیوں ’’را‘‘ اور ’’آئی بی‘‘ کے مزید 5 ایجنٹوں کو بے دخل کردیا گیا ہے میڈیا رپورٹ کے مطابق تخریب کاری میں ملوث مزید 5 بھارتی سفارت کاروں کو واہگہ کے راستے ملک سے بے دخل کردیا گیا، واہگہ کے راستے بھارت واپس جانے والے بھارتی سفارتی عملے میں راجیش کماراگنی ہوتری، امردیپ سنگھ، ٹوڈواٹا چی سمیت 6 افراد شامل ہیں۔گزشتہ روز بھی 3 بھارتی سفارت کاروں کو اسلام آباد سے پرواز ای کے 613 کے ذریعہ براستہ دبئی بھارت واپس روانہ کیا گیا تھا۔ پاکستان نے سفارتی آداب کی خلاف ورزی اور ملک کی سالمیت کے خلاف کام کرنے والے آٹھوں سفارت کاروں کو ناپسندیدہ قرار دیا تھا۔واضح رہے چند ماہ قبل بلوچستان سے ’’را‘‘ کا افسر کل بھوشن یادیو پکڑا گیا تھا جسے مسلمان کی حیثیت سے بھارتی پاسپورٹ جاری کیا گیا تھا اور اس کے پاسپورٹ پر ایران کا ویزا تھا جب کہ گزشتہ ہفتے سیکیورٹی ایجنسیز نے سفارت کاروں کے لبادے میں بھارتی سفارت کاروں کا ایک نیٹ ورک پکڑ لیا تھا جو کہ تخریب کاری میں ملوث پایا گیا۔

موضوعات:آئی بی بھارت بھارتی ایجنٹ پاکستان را