کابل (این این آئی)افغانستان میں پاکستانی نژاد آسٹریلوی خاتون کو اغوا ء کرلیا گیا ۔غیر ملکی میڈیا کے مطابق کابل پولیس کے سربراہ جنرل عبدالرحمٰن رحیمی نے اتوار کو کہا کہ خاتون کو ہفتہ کو دیر گئے ان کے ڈرائیور کے ہمراہ اغوا کیا گیا۔

افغانستان کے دارالحکومت کابل سے ایک پاکستانی نڑاد آسٹریلوی خاتون کو نامعلوم مسلح افراد نے اغوا کر لیا ہے اس واقعہ کی تحقیقات میں خاصی پیش رفت ہوئی ہے تاہم سردست وہ اس بارے میں ذرائع ابلاغ کو آگاہ نہیں کر سکتے۔ جنرل رحیمی نے خاتون سے متعلق مزید تفصیلات تو فراہم نہیں کیں لیکن پولیس کے ایک عہدیدار نے نام ظاہر نہ کرنے کی شرط پر امریکی میڈیا کو بتایا کہ خاتون کی عمر تقریباً 40 سال سے زائد ہے اور وہ ایک ایجنسی کوآرڈینیٹنگ باڈی فار افغان ریلیف نامی تنظیم کے لیے کام کرتی ہیں۔

اطلاعات کے مطابق اغوا کا یہ واقعہ کابل شہر میں قلعہ فتح اللہ نامی علاقے میں پیش آیا۔ادھر آسٹریلوی وزارت خارجہ نے ایک بیان میں اپنے ایک شہری کے اغوا ہونے کی تصدیق کرتے ہوئے کہا ہے کہ خطرناک سلامتی کی صورتحال اور اغوا کے خطرات کے پیش نظر آسٹریلیا اپنے شہریوں کو افغانستان کا سفر نہ کرنے کی ہدایت کرتا رہا ہے۔

موضوعات:افغانستان خاتون