واشنگٹن(این این آئی)امریکا کے شمال مشرق میں واقع ریاست نیو ہیمپشائر کے ایک قصبے ایش لینڈ میں ایک کسان نے اپنے فارم میں موجود بیت الخلا کو آئندہ صدارتی انتخابات کے لیے پولنگ بوتھ میں بدل ڈالا۔میڈیارپورٹس کے مطابق امریکا کے انتخابی سیزن میں جاری واقعات سے نالاں کسان کرس اووینز امیدواروں کے درمیان اس اعصابی جنگ کو مضحکہ خیز قرار دیتے ہیں۔فارم میں فرضی پولنگ بوتھ کے باہر ہیلری کلنٹن اور ڈونلڈ ٹرمپ کی مصنوعی ڈمی بنا کر رکھی گئی ہیں اور ڈرامائی منظر میں ان کو بیت الخلا کے استعمال کے لیے اپنی باری کا انتظار کرتے ہوئے دکھایا گیا ہے۔ بیت الخلا کا دروازہ کھلا رکھا گیا ہے اور بعض پلے کارڈز پر تحریر ہے کہ صرف 16 برس سے زیادہ عمر کے افراد ووٹ ڈال سکتے ہیں جب کہ دو عدد کموڈ پر تیر کا نشان لگا کر ہدایت دی گئی ہے کہ اپنا ووٹ اس کے اندر ڈالیے۔اووینز کے مطابق اس نے پہلے سے سیکڑوں ووٹنگ کارڈ جمع کر لیے ہیں جن کو ڈال کر وہ طے کرے گا کہ ٹرمپ یا ہیلری میں سے کون جیتا ؟ اووینز نے واضح کیا کہ وہ ووٹنگ میں جلدی نہیں کرے گااور اس کو 8 نومبر کو ہونے والے انتخابات کے ساتھ ہی عمل میں لایا جائے گا تاکہ نتیجے کو دیکھا جا سکے۔ اووینز کا کہنا تھا کہ یہ سب محض لطف اندوزی کا سامان ہے۔