اسلام آباد (نیوز ڈیسک) ملک بھر میں عیدالاضحیٰ 27 مئی کو منائے جانے کا امکان ظاہر کیا جا رہا ہے،

جس کے پیش نظر شہریوں نے تعطیلات کے حوالے سے تیاریوں کا آغاز کر دیا ہے۔ ذرائع کے مطابق اس سال عید پر 5 سے 6 روز کی سرکاری چھٹیاں ملنے کی توقع ہے۔سرکاری کیلنڈر کے مطابق عیدالاضحیٰ کی تعطیلات 27 مئی سے 29 مئی تک متوقع ہیں، جو بدھ سے جمعہ کے دنوں پر مشتمل ہوں گی۔ اس کے بعد ہفتہ اور اتوار کی ہفتہ وار تعطیلات شامل ہونے سے مجموعی طور پر 5 دن کا وقفہ بن سکتا ہے۔

حکومتی حلقوں کا کہنا ہے کہ عوام، خصوصاً دوسرے شہروں میں مقیم افراد کو اپنے آبائی علاقوں میں سفر کی سہولت دینے کے لیے امکان ہے کہ تعطیلات کا آغاز 26 مئی بروز منگل سے کر دیا جائے۔ اگر ایسا ہوا تو عید کی چھٹیاں مسلسل 6 روز تک جاری رہ سکتی ہیں۔

تاہم حتمی فیصلہ وفاقی حکومت کی جانب سے جاری کیے جانے والے باضابطہ نوٹیفکیشن کے بعد ہی سامنے آئے گا، جس کا شہری بے چینی سے انتظار کر رہے ہیں۔