اسلام آباد( مانیٹرنگ ڈیسک) بھارت نے سرجیکل سٹرائیک کے شواہد دنیا کے سامنے لانے سے پھر انکار کر دیا۔ بھارتی ٹی وی نے اعلیٰ سیاسی اور فوجی قیادت کے حوالے سے دعویٰ کیا ہے کہ بھارت کے پاس سرجیکل سٹرائیک کے تمام شواہد موجود ہیں مگر وہ مصلحت کے تحت ان ثبوتوں کو دنیا کے سامنے نہیں لائے گا۔اس حوالے سے بھارتی ٹی وی نے انوکھی منطق پیش کی ہے کہ اگر سرجیکل سٹرائیک کے شواہد سامنے لائے گئے تو دونوں ایٹمی ملکوں کے درمیان کشیدگی میں اضافہ ہوگا اور جنگ کی صورتحال پیدا ہو سکتی ہے۔ سرجیکل سٹرائیک کی ویڈیو منظرعام پر لائی گئی تو دنیا اسے بھارت کی غلطی تسلیم کر ے گی اور یہ تاثر جنم لے گا کہ بھارت پاکستان کے سامنے جواب دہ ہے۔بھارتی ٹی وی کے مطابق اڑی واقعہ کے بعد بھارتی سیاسی قیادت نے فوج کو کنٹرول لائن عبور کرنے کی اجازت دی۔ بھارت نے جنوبی ایشیا اور دنیا کے دیگر ممالک کے ساتھ اچھے سفارتی تعلقات کے باوجود سرجیکل سٹرائیک کے بارے میں آپریشن مکمل ہونے تک کسی کو بھی نہ بتایا۔بھارتی ٹی وی نے ایک نیا شوشہ بھی چھوڑا کہ بھارتی فوج نے ایل او سی کے ساتھ ساتھ ڈھائی سو کلومیٹر تک دہشت گردوں کے کیمپ تباہ کئے۔
دوسری جانب پاک بھارت تناوجاری رہنے سے بھارت سے کپاس کی کروڑ ڈالر تک کی برآمدات متاثر ہونے پر تاجر پریشانی کا شکار ہو گئے ہیں۔ ماہرین کا کہنا ہے کہ بھارت کو بڑی مقدار میں کپاس کی برآمد رکنے سے زیادہ نقصان ہوگا۔پاک بھارت تجارت کا زیادہ فائدہ تو ویسے بھارت کے حق میں ہی ہے کیونکہ بھارت پاکستان کو فارمل دو ارب ڈالر اور ان فارمل 4ارب ڈالر کی اشیا برآمد کرتا ہے۔ بھارت پاکستان کو6 ارب ڈالر کی برآمدات کرتا ہے جبکہ پاکستان صرف ایک ارب ڈالر تک ہی کی برآمدات بھارت کو کرتا ہے۔پاک بھارت جاری تناوکا زیادہ نقصان بھارت کو ہی ہوگا۔آ ل نڈسٹریل الائنس کے صدر میاں زاہد حسین کا کہنا ہے کہ کپاس کی فصل خراب ہونے پر پاکستان نے گزشتہ برس کروڑ ڈالر کی کپاس بھارت سے خریدی تھی۔ اس سال بھی کپاس کی اتنی کی تعداد کی تجارت متوقع تھی۔ماہرین کا تو کہنا ہے کہ اس سال بھی پاکستان کو کپاس کی بھارت اور دیگر ممالک سے خریدنی ہوگی۔ وجہ فصل کی پیداوارمتاثر ہونا ہے لیکن دونوں ممالک کے تاجر موجود حالات سے شدید پریشان ہیں۔ماہرین کا کہنا ہے کہ بھارت زبانی جنگی جنون میں جتنا بھی آگے نکل جائے لیکن تجارتی معاملے پر اتنا بڑا نقصان نہیں اٹھائے گا