اسلام آباد (مانیٹرنگ ڈیسک ) بھگدڑ سے بچنے کیلئے سعودی حکام نے فیصلہ کیا ہے کہ آئندہ ماہ دورانِ حج کنکریاں مارنے کے اوقات میں کمی کی جائے گی۔ سعودی اخبارات نے سعودی حکام کے حوالے سے اپنی رپورٹ میں کہا کہ جمرات پر کنکریاں مارنے کے اوقات کو کم کر کے 12 گھنٹے کر دیا جائے گا۔شیطان کو کنکریاں مارنے کا عمل حسب معمول منیٰ میں 11 ستمبر کو شروع ہو کر تین دن تک جاری رہے گا۔ منٰی کا مقام مسجد الحرام سے تقریباً پانچ کلومیٹر کے فاصلے پر واقع ہے۔غیرملکی خبر رساں ادارے کے مطابق حج سے متعلق وزارت کا کہنا ہے کہ رواں برس پہلے دن صبح چھ بجے سے لے کر ساڑھے دس بجے تک کنکریاں مارنے کی اجازت نہیں ہوگی۔ دوسرے دن دوپہر دو بجے سے شام چھ بجے تک جبکہ تیسرے اور آخری دن صبح ساڑھے دس بجے سے لے کر دو بجے تک کنکریاں مارنے کی اجازت نہیں ہوگی۔سعودی گزٹ نے وزرات کے نائب سیکریٹری حسین الشریف کے حوا لے سے بتایا کہ اس عمل سے حاجیوں کو کنکریاں مارنے میں آسانی ہوگی اور رش کم ہونے کی وجہ سے بھگدڑ کا خطرہ نہیں رہے گا۔

موضوعات:جمرات