واشنگٹن(این این آئی)ایک امریکی تھنک ٹینک نے خدشات ظاہر کیے ہیں کہ ترکی میں موجود امریکی جوہری ہتھیار دہشت گردوں کے ہاتھ لگنے کے خطرے سے دوچار ہیں۔ترکی کے جنوب میں امریکا کے زیراستعمال انچرلک فوجی اڈے میں قریب پچاس جوہری ہتھیار موجود ہیں،کیا ترکی میں کسی بدامنی کی صورت میں امریکا اپنے جوہری ہتھیاروں کے تحفظ کو ممکن بنا سکتا تھا؟ غیرملکی خبرررساں ادارے کے مطابق پیر کے روز ایک رپورٹ میں واشنگٹن کے اس تھنک ٹینک نے دعویٰ کیا ہے کہ ترکی کے جنوب میں امریکا کے زیراستعمال انچرلک فوجی اڈے میں قریب پچاس جوہری ہتھیار موجود ہیں، جب کہ اس فوجی اڈے کے ترک کمانڈر کو گزشتہ ماہ ہونے والی ناکام فوجی بغاوت میں ملوث ہونے کے جرم میں گرفتار کیا جا چکا ہے۔ پیر کے روز جاری کردہ ایک رپورٹ میں اس تھنک ٹینک کی جانب سے سوال اٹھایا گیا ہے کہ آیا ترکی میں کسی بدامنی کی صورت میں امریکا اپنے جوہری ہتھیاروں کے تحفظ کو ممکن بنا سکتا تھا؟