انقرہ(آئی این پی)ترک صدر رجب طیب اردگان نے کہا ہے کہ اگر یورپی یونین نے مہاجرین سے متعلق ڈیل میں ترکی کے ساتھ کیے گئے وعدے پورے نہ کیے تو یہ ڈیل ختم ہو جائے گی۔ ایک فرانسیسی اخبار کو دیئے گئے انٹرویو میں اردگان نے کہا کہ یورپی یونین ترک باشندوں کے لیے شینگن ممالک کی ویزا فری انٹری یقینی بنائے۔ اردگان نے کہا کہ یورپی یونین ترکی کے ساتھ مخلصانہ رویہ اختیار نہیں کر رہی۔ انہوں نے کہا کہ اس ڈیل کے تحت ترک باشندوں کے لیے یورپ کا ویزا فری سفر یکم جون سے شروع ہونا تھا، جس پر اب تک عمل نہیں کیا گیا۔ انہوں نے واضح الفاظ میں کہا کہ اگر ترکی کے مطالبات پورے نہ کیے گئے، تو اس ڈیل پر عمل درآمد ممکن نہیں رہے گا۔