ڈھاکہ (آئی این پی)بنگلہ دیش میں پولیس نے وزیراعظم کے بیٹے کی ہلاکت کی افواہیں پھیلانے کے الزام میں 3 صحافیوں کو گرفتار کرلیا۔غیر ملکی میڈیا کے مطابق بنگلہ دیشی پولیس نے ایک نیوز ویب سائٹ کے دفتر پر چھاپہ مار کر وزیراعظم کے بیٹے کی ہلاکت کی افواہیں پھیلانے کے معاملے میں تین صحافیوں کو حراست میں لے لیا ہے۔ اس سے پہلے بنگلہ دیش میں درجنوں نیوز ویب سائٹس بلاک بھی کی گئی ہیں۔ پولیس نے مقبول ویب سائٹ بنگلہ میل 24 ڈاٹ کام کے ڈھاکا میں واقع دفتر پر چھاپہ مار کر پانچ گھنٹوں تک تلاشی لی۔ بتایا گیا ہے کہ پولیس نے اس ویب سائٹ کے ایگزیکٹیو ایڈیٹر اور دیگر دو صحافیوں کو گرفتار کر لیا ہے۔ اس ویب سائٹ نے اپنے فیس بک صفحے پر وزیراعظم کے بیٹے سجیب واجد کی ایک جہاز حادثے میں ہلاکت کی افواہوں کا ذکر کیا تھا لیکن اس کے بعد ان خبروں کے جھوٹے ہونے کی وضاحت بھی کر دی گئی تھی۔