اسلام آباو( آن لائن )وکی لیکس نے دعویٰ کیا ہے کہ ترکی نے ملک بھر میں اس کی ویب سائیٹ کو بلاک کرنے کا حکم جاری کیا ہے۔تنظیم کا کہنا ہے کہ یہ اقدام اس کی طرف سے صدر رجب طیب اردوان کی حکمرا ن جماعت سے متعلق تقریباً تین لاکھ ای میلز جاری کیے جانے کے اعلان کے بعد اٹھایا گیا۔ٹوئیٹر پر ایک پیغام میں ان معلومات کو افشا کرنے کے ارادے کا اظہار کرتے ہوئے خفیہ معلومات افشا کرنے والی متنازع تنظیم وکی لیکس نے کہا کہ لڑائی کے لیے تیار ہو جائیں ہم ترکی کے طاقت کی ڈھانچے کے بارے میں ایک لاکھ سے زائد دستاویزات جاری کر رہے ہیں ۔وکی لیکس کے بانی جولیان آسانج ایک آسٹریلوی شہری ہیں اور انہوں نے برطانوی پولیس کی گرفتاری سے بچنے کے لیے چار سال سے لندن میں ایکوڈور کے سفارت خانے میں پناہ لے رکھی ہے۔