لندن(این این آئی)برطانیہ میں یورپی یونین سے الگ ہونے کے سوال پر 23 جون کو ہونے والے ریفرنڈم سے فوری قبل اور اس کے بعد ملک میں نفرت کی بنیاد پر کیے جانے والے جرائم کی تعداد میں اضافہ ہو گیا ۔میڈیارپورٹس کے مطابق یہ بات برطانوی پولیس کی طرف سے بتائی گئی ہے۔ پولیس کے مطابق 16 جون سے 30 جون تک کے عرصے میں تین ہزار سے زائد ایسے جرائم پولیس کو رپورٹ کیے گئے۔ نیشنل پولیس چیفس کونسل کے مطابق یہ تعداد گزشتہ برس اسی عرصے کے دوران ہونے والے ایسے جرائم کے مقابلے میں 42 فیصد زائد ہے۔ اس نوعیت کے سب سے زیادہ جرائم 25 جون کو کیے گئے جن کی تعداد 289 تھی۔ بریگزٹ کے سوال پر ریفرنڈم کے نتائج 24 جون کو سامنے آئے تھے، جس میں برطانوی عوام کی اکثریت نے یورپی یونین سے نکلنے کے حق میں ووٹ دیا تھا۔