رائے پور(نیوز ڈیسک)بھارتی ریاست چھتیس گڑھ میں انتہا پسند ہندوؤں نے ایک گرجاگھر پر حملہ کرکے وہاں عبادت میں مصروف کئی افراد کو شدید زخمی کردیا۔بھارتی میڈیا کے مطابق یہ واقعہ چھتیس گڑھ کے علاقے خامردی میں پیش آیا جہاں ایک گرجا گھرمیں ہندو انتہا پسندوں کیایک جتھے نے اس وقت دھاوا بولا جب وہاں ہفتہ وار عبادت کی جارہی تھی۔ لاٹھیوں، ڈنڈوں اور کلہاڑیوں سے لیس انتہا پسندوں نے چرچ میں توڑ پھوڑ کی اور عبادت میں مصروف لوگوں کو تشدد کا نشانہ بنایا۔ ہندو بلوائیوں کے تشدد سے زخمی ہونے والوں میں مردوں کے علاوہ بوڑھے، کواتین اور بچے بھی شامل ہیں۔عیسائیوں کی مقامی تنظیم کے رہنما کے مطابق حملہ آوروں کی تعداد 10 سے 12 تھی اور اپنے مذہبی نعرے لگارہے تھے، پولیس کو واقعے کی اطلاع دیے جانے کے باوجود اب تک حملہ آوروں کے خلاف کوئی کارروائی عمل میں نہیں لائی گئی۔واضح رہے کہ بھارت میں اقلیتوں کے ساتھ متعصبانہ سلوک اور ان پر تشدد کوئی نئی بات نہیں ،چھتیس گڑھ میں ہی گزشتہ 5 ہفتوں کے دوران چرچ پر ہونے والا یہ چوتھا حملہ ہے۔دوسری جانب چھتیس گڑھ ہی کے ضلع نارائن پور میں ماؤ نواز علیحدگی پسندوں کی جانب سے کئے گئے ایک بارودی سرنگ کے دھماکے میں 2 افراد ہلاک ہوگئے،اطلاعات کے مطابق مرنے والے دونوں افراد مزدور تھے جوکہ مرکزی شاہراہ کی تعمیر میں مصروف تھے۔