تہران(نیوزڈیسک)بدلتے عالمی حالات،چین کا تہلکہ خیز اقدام،دنیا سوچتی رہ گئی، ایران اورچین نے مل کر نئی تاریخ رقم کردی،ایران اور چین کی میڈیا کے مطابق ایک مال بردار ٹرین پیر کے روز چین سے تہران پہنچی ہے۔ایران پر عائد بین الاقوامی اقتصادی پابندیوں کے اٹھائے جانے کے بعد اسے ایران کے ساتھ تجارت کرنے کی سمت میں ایک اہم قدم کے طور پر دیکھا جا رہا ہے۔نیوز ایجنسی آئی ایس این اے کے مطابق 32 کنٹینروں پر مشتمل یہ مال بردار ٹرین چین کے شمالی شہر ییوو سے چل کر 14 دنوں کے بعد ایران پہنچی۔ اس نے 10399 کلومیٹر کا فاصلہ طے کیا ہے۔یہ نہیں بتایاگیاکہ ٹرین پر کیا سامان لدا ہوا تھا۔یہ ٹرین قزاقستان اور ترکمانستان کے راستے ایران پہنچی ہے۔چین کی نیوز ایجنسی شن ہوا نے ایران کے وزیر ٹرانسپورٹ اور ریلویے کے سربراہ محسن پور آقائی کے حوالے سے کہا ہے کہ بحری جہاز کو عام طور پر شنگھائی سے ایران کے بندرگاہ بندر عباس آنے میں ڈیڑھ ماہ کی مدت لگتی تھی اور ٹرین کے اس راستے کے ذریعے یہ سفر 30 دن کم ہو گیا ہے۔چین بین الاقوامی پابندیوں کے ہٹائے جانے کے بعد سے ایران کے ساتھ بہت قریبی تعلقات استوار کرنا چاہتا ہے اور بیجنگ ’ون بیلٹ ون روڈ‘ یعنی ایک خطہ ایک راستہ کی پالیسی کے تحت ایران کو اہم ملک تصور کرتا ہے جہاں وہ اپنی ملکی معیشت اور اپنی کمپنیوں کے لیے نیا منڈی دیکھتا ہے۔