صنعائ(نیوزڈیسک)خانہ جنگی کے شکار ملک یمن کے وسطی علاقے میں امریکی ڈرون حملے میں 4 مشتبہ عسکریت پسند ہلاک ہو گئے ۔غےر ملکی مےڈےاکے مطابق سکیورٹی حکام کا کہنا ہے کہ وسطی یمن کے بیدا اور شبوا صوبوں کی سرحد پر منگل کی شام یہ حملہ کیا گیا تھا۔ ڈرون حملے کا نشانہ ایک گاڑی تھی۔ اِس حملے کے نتیجے میں گاڑی پر سوار مبینہ عسکریت پسند ہلاک ہو گئے۔ یمن میں ایک طرف حوثی شیعہ ملیشیا اور صدر منصور ہادی کے فوجیوں کے درمیان مسلح کشمکش جاری ہے تو دوسری جانب القاعدہ سے وابستگی رکھنے والے گروپ ’عقاپ’ کے ساتھ ساتھ ’اسلامک اسٹیٹ‘ کے جہادی بھی موت کا بازار گرم کیے ہوئے ہیں۔