اسلام آباد (اے این این) سعودی وزارت حج کے آن لائن ای نمبر سسٹم میں خرابی دور نہ ہو سکی۔ دنیا بھر میں عمرہ ویزہ کا اجرا رک گیا ٗ عمرہ زائرین کو ہوائی ٹکٹوں کی مد میں کروڑوں روپے کا نقصان۔ تفصیلات کے مطابق دنیا بھر میں عمرہ زائرین کیلئے ویزوں کے اجراء کے آن لائن سعودی نظام میں تکنیکی خرابی کے باعث عمرہ ویزوں کے اجراء کا نظام پیر سے تعطل کا شکار ہے جس کی وجہ سے عمرہ زائرین کو ٹکٹوں کی مد میں کروڑوں روپے کا نقصان برداشت کرنا پڑ رہا ہے ۔عمرہ کمپنی کے ذرائع نے بتایا کہ سعودی وزارت حج کی طرف سے پاکستان سمیت دنیا بھر میں رواں سال کیلئے عمرہ ویزوں کے اجراء کیلئے بنائے گئے آن لائن نظام میں تکنیکی خرابی کا سامنا کرنا پڑ رہا ہے ۔ عمرہ ویزہ کی سعودی عرب سے منظوری آنے کے باوجود ای نمبر نکالنے کا سسٹم پچھلے دو روز سے خراب ہے جس کے باعث پاکستان سمیت دنیا بھر کے عمرہ زائرین شدید پریشانی کا شکار ہیں ۔ اسلام آباد میں سعودی سفارتخانے کی جانب سے یہ عذر پیش کیا جارہا ہے کہ پوری دنیا کا عمرہ سسٹم خراب ہے جس میں درپیش تکنیکی خرابی کو دور کرنے کیلئے سعودی وزارت حج مصروف عمل ہے۔