ریاض (نیوز ڈیسک) سعودی عرب میں ایک معمر برطانوی کو شراب بنانے کے الزام میں 350 کوڑوں کی سزا سنا دی گئی۔ 74 سالہ کارل اینڈری کو گزشتہ برس جدہ سے گرفتار کیا گیا تھا۔ اہلخانہ کا کہنا ہے اینڈری تین بار کینسر کا شکار ہوچکا ہے جبکہ اسے دمہ بھی ہے، اس لئے برطانوی حکومت مداخلت کرتے ہوئے ان کی رہائی کے لئے اقدامات کرے۔ اینڈری کی بیٹی کا کہنا تھا کہ ان کے والد نے 25 سال سعودی عرب میں گزارے مگر پھر بھی ان کے ساتھ کسی قسم کی رعایت نہیں کی جاری رہی جبکہ میری والدہ کی برطانیہ میں طبیعت خراب ہے۔ انہوں نے مزید کہا میرے والد کو 14 ماہ قبل 12 ماہ قید کی سزا سنائی گئی تھی مگر وقت پورا ہونے کے باوجود ابھی تک رہائی عمل میں نہیں آسکی۔ برطانوی دفتر خارجہ کا کہنا ہے کہ وہ اس حوالے سے سعودی حکومت سے رابطے میں ہیں اور اینڈری کی رہائی کے لئے کوششیں کی جارہی ہیں۔