بغداد(نیوز ڈیسک)عراقی فضائیہ کے لڑاکا طیاروں نے شام کی سرحد کے نزدیک مغربی صوبہ الانبار میں دولت اسلامیہ (داعش) کے خلیفہ ابوبکرالبغدادی کے قافلے پر فضائی حملہ کیا ہے۔تاہم البغدادی کے مارے جانے یا بچ جانے سے متعلق تاحال کوئی اطلاعات سامنے نہیں آئی ہے۔غیر ملکی میڈیا کے مطابق عراقی فضائیہ کے لڑاکا طیاروں نے شام کی سرحد کے نزدیک مغربی صوبہ الانبار میںداعش کے خلیفہ ابوبکرالبغدادی کے قافلے پراس وقت بمباری کی جب وہ داعش کے کمانڈروں کے اجلاس میں شرکت کے لیے الکرابلہ کے علاقے کی جانب جارہے تھے۔ عراقی فوج نے ایک بیان میں اس حملے کی اطلاع دی ہے اور کہا ہے کہ داعش کے لیڈر کے بارے میں فی الوقت کچھ معلوم نہیں ہے کہ آیا وہ بمباری میں بچ گئے ہیں،زخمی ہوئے ہیں یا ہلاک ہوگئے ہیں۔ادھر عراق کی وزارت دفاع کے مطابق اس بات کی تحقیقات جاری ہیں کہ آیا بغدادی اس قافلے میں موجود تھا یا نہیں۔ واضح رہے کہ 2015ءکے اوائل میں عراقی وزیراعظم حیدرالعبادی نے عرب اخبار کے ساتھ ایک انٹرویو میں ابوبکرالبغدادی کے شمال مغربی قصبے قائم میں ایک فضائی حملے میں زخمی ہونے کی اطلاع دی تھی اور ان کے زندہ بچ جانے کو ایک معجزہ قرار دیا تھا۔