واشنگٹن (نیوز ڈیسک) امریکہ کئی دہائیوں تک مشرق وسطیٰ میں طاقت کا محور رہا ہے اور وہ اپنے اتحادیوں کو رہنمائی اور تحفظ دیتا رہا ہے مگر اب روس اور ایران علاقائی معاملات میں کھل کر سامنے آگئے ہیں جس کی وجہ سے امریکہ کا خصوصی کردار معدوم ہوتا دکھائی دے رہا ہے۔ وال سٹریٹ جرنل کی رپورٹ کے مطابق مختلف ممالک میں امریکہ کے سفیر رہنے والے ریان کروکر کا کہنا ہے دوسری عالمی جنگ کے بعد اب امریکہ کا مشرق وسطیٰ میں اثرورسوخ کم ترین سطح پر ہے۔ انہوں نے مزید کہا مشرق وسطیٰ کے دل یعنی عراق میں ایک وقت میں امریکہ تھا مگر اب ایران کی شیعہ جنگ، داعش اور روس ہیں۔ ایک اور سابق سفیر جیمز جیفری کا کہنا ہے اصل چیز امریکہ کی فوجی طاقت نہیں ہے، لوگوں کا اعتماد اہم ہے، ہمیں اپنے دوستوں کے دفاع کے لئے طاقت استعمال کرنی چاہیے، اگر امریکہ خطرہ مول نہیں لے گا تو کوئی بھی نہیں لے گا اور لوگ خوفزدہ ہوگئے تو امریکہ کو واپس جانا پڑے گا۔