اسلام آباد (آن لائن) روس کے دارالحکومت ماسکو میں واقع 111 سال پرانی مسجد عید الاضحی پر دوبارہ کھول دی جائیگی۔ ماسکو میں رہائش پذیر 20 لاکھ سے زائد مسلمانوں کیلئے بڑی عید کا یہ بڑا تحفہ قرار دیا جا رہا ہے اور وہ اس تاریخی مسجد کے کھولے جانے پر بہت خوش دکھائی دیتے ہیں۔ قدیم کیتھڈرل مسجد دوبارہ کھولے جانے کی تقریب عید الاضحیٰ 23 ستمبر 2015ءکو متوقع ہے۔ 19 ہزار مربع میٹرز پر تعمیر کی گئی یہ مسجد یورپ کی سب سے بڑی مسجد ہے روسی مسلم بورڈ کے مطابق اس مسجد کو 2011ءمیں شہید کردیا گیا تھا۔ ماضی میں عیدین پر ماسکو کے ڈیڑھ لاکھ مسلمان یہاں نماز عید ادا کیا کرتے تھے۔ اسلام روس کا دوسرا بڑا مذہب ہے اور مسلمانوں کی تعداد تقریباً دو کروڑ ہے اور دارالحکومت ماسکو میں چھ مساجد ہیں۔