کابل(نیوزڈیسک) افغانستان کے صدر اشرف غنی نے ملک کی تاریخ میں پہلی بار سپریم کورٹ کے لیے کسی خاتون جج کو نامزد کردیا ہے۔میڈیا رپورٹ کے مطابق افغانستان جج ایسوسی ایشن کی سربراہ اور کم عمر افراد کی عدالت کی جج انیسہ رسولی کو سپریم کورٹ کے نو رکنی بینچ کے لیے نامزد کردیا گیا ہے۔انیسہ رسولی کی نامزدگی کئی اسلامی گروپوں کی مخالفت کی وجہ سے ایک ماہ سے تاخیر کا شکار تھی۔خواتین کے حقوق کے لئے کام کرنے والے افراد اور سیاستدانوں کے کابل میں ہونے والے ایک پروگرام سے خطاب کے دوران افغان صدر اشرف غنی نے کہاکہ مجھے اس بات پر فخر ہے کہ میں نے پہلی بار افغان سپریم کورٹ کے لیے کسی خاتون کو نامزد کیا ہے انھوں نے کہا کہ سپریم کورٹ کے لیے خاتون جج کو نامزد کرنے سے عدالتی نظام میں فرق نہیں آئے گا اور اس کےلئے انھیں علماء(اسلامی اسکالرز) کی مکمل حمایت حاصل ہے۔اشرف غنی نے کہا کہ وہ چاہتے ہیں کہ تمام وزارتیں نائب وزیر کے طور پر خواتین کو منتخب کریں۔یاد رہے کہ سپریم کورٹ کے جج کے طور پر کام کا ا?غاز کرنے کے لیے انیسہ رسولی کو ابھی افغان پارلیمنٹ سے منظوری کی ضرورت ہے۔