اسلام آباد(نیوزڈیسک )امریکی ریاست جنوبی کیرولائنا میں افریقی نژاد امریکیوں کے گرجا گھر پر ایک سفید فام حملہ آور کی فائرنگ سے نو افراد کی ہلاکت کے بعد ملک میں اسلحہ تک رسائی کے معاملے پر دوبارہ بحث چھڑ گئی ہے۔
فائرنگ کا یہ واقعہ چارلسٹن نامی شہر میں واقع تاریخی گرجا گھر میں پیش آیا تھا اور پولیس نے اب اس واقعے میں ملوث 21 سالہ حملہ آور ڈائلن روف کو گرفتار کر لیا ہے۔
لیگزنٹن نامی علاقے کے رہائشی ڈائلن کو واقعے کے کئی گھنٹے بعد شیلبی میں ٹریفک روک کر گرفتار کیا گیا تاہم اب انھیں واپس چارلسٹن منتقل کر دیا گیا ہے۔
پولیس کا کہنا ہے کہ مشتبہ حملہ آور فائرنگ کرنے سے پہلے ایک گھنٹے تک چرچ کے اندر بیٹھا رہا تھا۔
پولیس کو ملنے والی ویڈیو فوٹیج میں مشتبہ حملہ آور کو چرچ کے اندر بیٹھے اور پھر ایک چار دروازوں والی بڑی کار میں وہاں سے روانہ ہوتے دیکھا جا سکتا ہے