نئی دہلی (آئی این پی)بھارتی سپریم کورٹ نے اس عدالتی فیصلے کو روک دیا ہے جس کے مطابق بھارت میں مقدس سمجھے جانے والے دریائوں کو زندہ تسلیم کرتے ہوئے انہیں بھی وہی قانونی حقوق دینے کا فیصلہ کیا گیا تھا جو انسانوں کو حاصل ہوتے ہیں۔
بھارتی میڈیا کے مطابق سپریم کورٹ نے مقدس سمجھے جانے والے دریائوں کو زندہ تسلیم کرنے سے متعلق فیصلے کو روک دیا ہے ۔ شمالی بھارتی ریاست اتر آکھنڈ کی ایک عدالت نے رواں برس مارچ میں فیصلہ سنایا تھا، جس کے تحت مقدس سمجھے جانے والے دو دریاں گنگا اور جمنا کو کسی بھی طرح نقصان پہنچانے والے افراد کو وہی سزائیں دی جا سکتی تھیں، جو کسی انسان کو نقصان پہنچانے پر دی جاتی ہیں۔ بھارتی میڈیا رپورٹوں کے مطابق اتر آکھنڈ کی حکومت نے اس عدالتی حکم کو گزشتہ ماہ یہ کہتے ہوئے چیلنج کر دیا تھا کہ قانون کی رو سے ایسا ممکن ہی نہیں۔
