سعودی عرب (نیوز ڈیسک) سویڈن کے ساتھ سفارتی کشیدگی کے باعث سویڈن کے ایک چڑیا گھر سے خریدے گئے ایمزون کے ننھے بندر لینے سے انکار کر دیا ہے۔سکینسن کے چڑیا گھر میں موجود پیگمے مارموسٹ نسل کے چار بندورں کو ریاض کے ایک چڑیا گھر بھیجا جانا تھا۔تاہم سکینسن کے چڑیا گھر کے منتظم جونس والسٹارم کا کہنا ہےکہ ’سیاسی صورتحال کے باعث اب انھیں یہ بندر نہیں چاہییں۔‘گذشتہ ماہ سعودی عرب نے اس وقت سویڈن سے اپنا سفیر واپس بلا لیا تھا جب سویڈن نے انسانی حقوق کے ایک تنازع کے باعث سعودی عرب کے ساتھ اسلحے کا ایک معاہدہ ختم کر دیا تھا۔محض ایک سو گرام سے ذرا کچھ زیادہ وزن کے یہ پیگمے مارموسٹ بندر دنیا کے سب سے چھوٹے بندر ہیں۔سویڈن کے ریڈیو کے مطابق والسٹارم کے بقول ’یہ قدرے مزاحیہ بات ہے۔ مجھے صرف انتظار ہے کہ وہ کب سویڈن کے تاجروں کو دوبارہ ویزا جاری کرتے ہیں۔ ہو سکتا ہے ان بندروں کو بھی اس وقت ویزا مل جائے۔‘گذشتہ ماہ سعودی عرب نے سویڈن کے وزیرِ خارجہ مارگٹ والسٹورم کی تقریر کو سعودی عرب کے داخلی معاملات میں دخل اندازی قرار دیا تھا۔سعودی عرب نے اس سے پہلے قاہرہ میں ہونے والے عرب لیگ کے اجلاس میں انھیں تقریر کرنے سے روک دیا تھا۔اپنی تقریر میں سویڈن کی وزیر خارجہ نے عرب قوم کے لیے ’تنظیمی، اسمبلی اور مذہب کی آزادی بالخصوص خواتین کے حقوق اور وسائل میں ان کی مناسب نمائندگی کا مطالبہ کیا تھا۔