ماسکو (نیوز ڈیسک) روس کے زیر تسلط علاقے داغستان کے ایک دور دراز گاﺅں میں پیدا ہونے والے میمنے کی عجیب وغریب شکل نے ہر دیکھنے والے کو دہشت زدہ کردیا ہے۔
برطانوی اخبار دی مرر کے مطابق جمہوریہ داغستان کے گاﺅں چرکا سے تعلق رکھنے والے 45 سالہ کسان بلیسیئس لاورنتیو کا کہنا ہے کہ وہ اپنی بھیڑ کے ہاں میمنے کی پیدائش کے بے صبری سے منتظر تھے لیکن جب وہ نومولود میمنے کو دیکھنے کے لئے پہنچے تو خوف سے ان کا دل بیٹھ گیا۔ وہ کہتے ہیں کہ ان کے سامنے جو چھوٹا سا جانور تھا اس کا باقی جسم تو میمنے جیسا ہی تھا لیکن اس کاچہرہ کسی غصیلے بوڑھے انسان جیسا تھا اور یہ گھور گھور کر انہیں دیکھ رہا تھا۔ بلیسیئس کا کہنا ہے کہ جب ان کے ہواس بحال ہوئے تو وہ انسانی چہرے اور لمبی ناک والے میمنے کے قریب گئے اور اسے غیر متوقع طور پر معصوم اور پیار کرنے والا پایا۔ انہوں نے فیصلہ کیا کہ وہ اسے ہلاک نہیں ہونے دیں گے اور اس کا خیال رکھیں گے۔ جب اس عجیب الخلقت میمنے کی خبر پھیلی تو دور و نزدیک سے سینکڑوں لوگ اسے دیکھنے کے لئے جمع ہو گئے اور تاحال اسے دیکھنے والوں کا تانتا بندھا ہے۔گاﺅں کی 56 سالہ خاتون ڈینا مشینا کا کہنا ہے کہ یہ میمنا بیک وقت خوفناک اور پیارا ہے لیکن یہ اس کے پوتے پوتیوں کو بہت خوفزدہ کردیتا ہے۔ بلیسیئس کی خوش قسمتی ہے کہ ایک مقامی سرکس نے میمنے کو غیر معمولی قیمت میں خریدنے کی پیشکش کی ہے اور غریب کسان کا کہنا ہے کہ وہ اسے سرکس کے حوالے کرنے سے پہلے چند دن اپنے ساتھ رکھنا چاہتا ہے تاکہ اس کی کمپنی سے لطف اندوز ہوسکے۔