لندن(نیوز ڈیسک) برطانیہ میں ایک ڈرون طیارے کے ذریعے جیل میں ممنوعہ سامان اورمنشیات پہنچانے کی کوشش کی گئی لیکن ریموٹ کنٹرولڈ ڈرون کے جیل کی دیوارسے ٹکرانے کے باعث یہ کوشش ناکام ہوگئی۔پولیس طیارے کوتحویل میں لے کراس کا جائزہ لے رہی ہے، طیارے سے منشیات، چاقو، موبائل فونز، اسلحہ اوردوسرا ممنوعہ سامان برآمد کرلیا گیاہے۔ برطانوی خبررساں ادارے ٹیلی گراف سے گفتگو کرتے ہوئے جیل ذرائع نے کہاکہ ہم نے پہلی بارایک ڈرون کوجیل میں ممنوعہ اشیا پہنچانے کے لیے استعمال ہوتے دیکھا ہے۔ اس کام کے لیے بلاشبہ بڑی مہارت درکارہوتی ہے۔ بیڈفورڈ شائرپولیس کے ترجمان کا کہنا ہے کہ اس واقعے میں ابھی تک کسی کو گرفتار نہیں کیاگیا، ہم مجرموں تک پہنچنے کی کوشش کررہے ہیں۔ جیل حکام کواس طرح کے مزیدواقعات سے بچنے کے لیے سیکیورٹی بڑھانے کے احکام جاری کردیے گئے ہیں۔