نئی دہلی(نیوز ڈیسک) بھارت میں خواتین کی عصمت دری کے بھیانک واقعات کنٹرول سے باہر ہونے کے بعد یوگا کے مشہور گرو بابا رام دیو خواتین کے تحفظ کے لئے میدان میں آگئے ہیں۔ بھارتی سائنسدان ڈاکٹر پون کوہلی اور دیگر ماہرین نے تقریبا 2 سال کی تحقیق کے بعد خواتین کے تحفظ کے لئے ایک ملٹی پرپز ہتھیار ایجاد کیا ہے جو کہ ایک ڈنڈے، چاقو، ٹارچ، سائرن اور صدمہ خیز بندوق کا کام کرے گا۔ اس کے ذریعے حملہ آور پر مرچوں کا سپرے بھی کیا جا سکتا ہے جبکہ اسے جی پی آر ایس کی سہولت سے بھی لیس کیا گیا ہے۔ عالمی شہرت یافتہ ارب پتی یوگی بابا رام دیو نے اس ہتھیار کی بڑے پیمانے پر تیاری کا فیصلہ کیا ہے تاکہ یہ بھارتی خواتین کو ارزاں نرخوں پر فراہم کیا جا سکے۔ خواتین نے رام دیو کے فیصلے کو سراہا ہے اور ان کی اکثریت اس ہتھیار کے حصول کی منتظر ہے۔