کراچی (نیوز ڈیسک)ملک کی سب سے بڑی ہول سیل ادویات مارکیٹ کو اچانک بند کیے جانے سے ادویات کی فراہمی متاثر ہو گئی، جس کے باعث کراچی سمیت دیگر علاقوں میں بھی سپلائی کا نظام درہم برہم ہو گیا۔
تفصیلات کے مطابق ضلعی انتظامیہ نے کارروائی کرتے ہوئے میڈیسن مارکیٹ کو سیل کر دیا، جس کے بعد دور دراز سے آنے والے تاجروں اور خریداروں کو شدید مشکلات کا سامنا کرنا پڑا۔ عید کی تعطیلات کے بعد مارکیٹ کھلتے ہی یہ صورتحال پیدا ہوئی، جس سے کاروباری سرگرمیاں متاثر ہوئیں۔اسسٹنٹ کمشنر حاظم بھنگوار کی ہدایت پر کی گئی اس کارروائی کے باعث ریٹیل سطح پر ادویات کی قلت کا خدشہ بھی پیدا ہو گیا تھا، کیونکہ ہول سیل مارکیٹ بند ہونے سے سپلائی چین متاثر ہو گئی تھی۔
دکانداروں اور مارکیٹ کے عہدیداران نے اس اقدام پر احتجاج کرتے ہوئے مؤقف اختیار کیا کہ انتظامیہ نے کوئی پیشگی اطلاع نہیں دی۔ ان کا کہنا تھا کہ تعطیلات کے بعد اسٹاک کی بحالی کے لیے یہ دن انتہائی اہم تھا، مگر اچانک بندش نے مسائل بڑھا دیے۔
صورتحال کی نزاکت کو دیکھتے ہوئے ڈپٹی کمشنر ساؤتھ نے مداخلت کی اور مارکیٹ کو دوبارہ کھولنے کی ہدایت جاری کی۔ بعد ازاں تاجروں سے ضابطوں کی پابندی کے حوالے سے یقین دہانی لی گئی، جس کے بعد مارکیٹ میں کاروبار بحال کر دیا گیا۔
