لاہور( این این آئی)ملک کے 5اضلاع کے ماحولیاتی نمونوں میں پولیو وائرس کی تصدیق ہوگئی۔وزارت صحت میں قائم انسداد پولیو لیبارٹری کے مطابق کراچی کے ضلع کیماڑی، حیدرآباد، ملتان، کوئٹہ اور فیصل آباد کے نمونوں میں پولیو وائرس پایا گیا ہے۔ان نمونوں میں پائے جانے والے وائرس کا تعلق سرحد پار سے ہے۔رواں سال اب تک ملک میں 2پولیو کیسز اور 71مثبت ماحولیاتی نمونے رپورٹ ہو چکے ہیں۔واضح رہے کہ دو روز قبل ملک بھر کے 6اضلاع سے ماحولیاتی نمونوں میں پولیو وائرس کی تصدیق ہوئی تھی۔

قومی ادارہ صحت میں قائم انسداد پولیو لیبارٹری کے مطابق 21فروری سے 27فروری کے درمیان کوئٹہ، چمن، اور پشاور سے لیے گئے سیوریج کے پانی کے 2،2نمونوں اور کراچی کے ضلع کورنگی، ضلع جنوبی اور بلوچستان کے ضلع مستونگ سے لیے گئے ایک ایک نمونے میں پولیو وائرس پایا گیا۔قومی ادارہ صحت کا کہنا تھا کہ دو روز قبل تک پاکستان میں رواں سال سامنے آنے والے تمام 65مثبت ماحولیاتی نمونوں میں پائے گئے وائرس کا تعلق وائے بی تھری اے کلسٹر سے ہے۔قومی ادارہ صحت نے کہا کہ وائے بی تھری اے کلسٹر 2021میں پاکستان میں ختم ہو گیا تھا اور جنوری 2023میں سرحد پار سے ملک میں واپس آیا تھا، اس وقت سے یہ کلسٹر 150سے زائد ماحولیاتی نمونوں اور 5کیسز میں پایا گیا ہے۔