اسلام آباد(آن لائن) وفاقی دارالحکومت کے سب سے بڑے ہسپتال پمز کے سرکاری ملازمین کرونا کی لپیٹ میں آ گئے ہیں، فرنٹ لائن پر لڑنے والے ڈاکٹرز ، نرسز و پیرا میڈیکل سٹاف کے 200 سے زائد سٹاف میں کرونا پازیٹو آ گیا ہے ۔ ہسپتال کو ہائی الرٹ کر دیا

گیا ہے ۔ مریضوں کو انتہائی ایمرجنسی میں ہسپتال آنے کی استدعا کر دی گئی ہے ۔ جمعہ کو پمز ہسپتال کے سرکاری سٹاف کرونا کی دوسری لہر کی مکمل لپیٹ میں آ گئے ہیں ۔ 200 ملازمین کرونا پازیٹو ہونے کے باعث قرنطینہ ہو گئے ہیں جبکہ مختلف وارڈز اور دفاتر میں حفاظتی سپرے جاری ہیں اس حوالے سے پمز کے ترجمان ڈاکٹر وسیم خواجہ نے بتایا کہ پمز میں کرونا مریضوں کی فرنٹ لائن پر علاج معالجے کی بدولت اس وقت 200 سے زائد ملازمین خود کرونا کا شکار ہو گئے ہیں جس کی وجہ سے سٹاف کی شدید کمی کا بھی سامنا ہے لیکن اس کے باوجود ڈاکٹرز ، نرسز ، پیرا میڈیکل ستاف ہمہ وقت مریضوں کے علاج معالجے کی خدمات سٹاف کمی کے باوجود 24 گھنٹے سرانجام دے رہے ہیں ۔ انہوں نے عام لوگوں سے انتہائی ضرورت اور ایمرجنسی میں ہسپتال آنے کی التجا کرتے ہوئے بتایا کہ اس وقت کرونا کی دوسری لہر بڑی تیزی سے وفاق میں پھیل رہی ہے تمام مریض اور لواحقین ماسک کا استعمال لازمی کریں اور تمام احتیاطی تدابیر اپنائے تب جا کر ہسپتال آئے ۔