لاہور( این این آئی)پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر سردار محمد الفرید ظفر نے شہریوں سے اپیل کی ہے کہ وہ کورونا کی موجودہ لہر سے بچنے کے لئے اپنا طرز زندگی تبدیل کریں ،صفائی پر خصوصی توجہ دیں اور پہلے سے بتائی جانے والی حفاظتی ہدایات پر مکمل طور پر عمل کریں ۔انہو ں نے شہریوں پر زور دیا کہ وہ لاک ڈاؤن میں نرمی کا ناجائز فائدہ نہ اٹھائیں اور وبائی مرض کو
سنجیدہ لے کر احتیاط کر لیں تاکہ کورونا کی پیچیدگیوں سے بچا جا سکے ۔ پروفیسر الفرید ظفر نے میڈیا سے گفتگو کرتے ہوئے نوجوانوں سے بھی کہا ہے کہ وہ باہر نکلنے کی بجائے گھروں میں بیٹھ کر آن لائن ایجوکیشن کو ترجیح دے کر اپنا مستقبل روشن کریں ۔ایک سوال کے جواب میں پروفیسر الفرید ظفر نے کہا کہ ہسپتالوں کو کورونا کی وجہ سے غیر معمولی صورتحال کا سامنا ہے اور ان حالات میں فرنٹ لائن پر خدمات سر انجام دینے والے بلا شبہ ہم سب کے قومی ہیرو ہیں اور دنیا کا کوئی معاوضہ اُن کی خدمات کا نعم البدل نہیں ہو سکتا۔انہوں نے شہریوں سے اپیل کی کہ وہ حفاظتی ماسک اور سینی ٹائزر کے ساتھ ساتھ گلوز کا استعمال یقینی بنائیں اور اگر خدانخواستہ کسی شخص میں کورونا وائرس کی تصدیق ہو جائے تو اُس سے گھبرانے کی بجائے علاج کی طرف آنا چاہیے اور اپنے دوسرے گھر والوں سے علیحدگی اختیار کرتے ہوئے تمام حفاظتی اقدامات برؤئے کار لانا چاہئیں ۔پرنسپل پی جی ایم آئی نے کہا کہ کورونا کے متعلق عوامی شعور اجاگر کرنے کیلئے حکومت ، میڈیا اور طبی ماہرین ایک صفحے پر ہیں اور مشترکہ حکمت عملی کے ذریعے صورتحال کا سامنا کیا جا رہا ہے ۔انہوں نے توقع ظاہر کی کہ انشاء اللہ حالات اسی طرح کنٹرول میں رہیں گے اور جلد اس وبا سے شہریوں کو چھٹکارا ملے گا ۔
